सहकारी ठग्ने होस् वा मान्छे बेच्ने होस्, कुनै शक्तिको आडमा उन्मुक्ति पाउनु हुँदैन : काङ्ग्रेस नेता थापा

नेपाली कांग्रेसका महामन्त्री गगनकुमार थापाले कुनै दलको वा सत्तानिकट दलको भएका आधारमा कुनै पनि अपराध कार्य गर्ने व्यक्तिले उन्मुक्ति नपाउने बताएका छन् । शनिबार काठमाडौंमा अर्घाखाँची–काठमाडौं सम्पर्क समितिको प्रथम अधिवेशनमा बोल्दै महामन्त्री थापाले यस्तो बताएका हुन् ।

गलत गरेको मान्छे चाहे त्यो आफ्नै पार्टीको होस् वा अर्को पार्टीको मान्छे होस् । चाहे त्योत घण्टी बजाउने मान्छे होस् वा डमरू बजाउने होस् । सार्वजनिक जग्गा लुट्ने होस् वा मान्छे बेच्ने होस् । गलत गर्ने व्यक्ति गलत हुन्छ,' महामन्त्री थापाले भने, 'कांग्रेस हो र जय नेपाल भन्यो भन्नेवित्तिकै कोही पनि सज्जन हुँदैन । निर्देोष हुँदैन । यो पार्टीको पोजिसन हो । त्यसैले निर्धक्क भएर गलतलाई गलत भनौँ ।'

उनले अहिले तीन वटै तहको सरकारमा कांग्रेसको नेतृत्वदायी भूमिका रहेकाले देश बिग्रियो¸खत्तम भयो भनेर कांग्रेसले भन्न नपाउने बताए । बरू हरेक नागरिकलाई महसुस हुने गरी अहिले नै कांग्रेसले आफ्नो उपस्थिति देखाउनुपर्ने उनको भनाइ थियो ।