बैतडी :-

बैतडी जिल्ला ऐतिहासिक, धार्मिक र प्राकृतिक रूपमा अत्यन्त महत्वपूर्ण गन्तव्य हो । यहाँका सांस्कृतिक सम्पदा, धार्मिक स्थलहरू र मनोरम दृश्यहरूले स्वदेशी तथा विदेशी पर्यटकलाई आकर्षित गर्दै आएका छन् ।

नेपालका प्रमुख धार्मिक स्थलहरूमध्ये बैतडी एक महत्वपूर्ण केन्द्रका रूपमा चिनिन्छ । विशेषगरी, यहाँ रहेका सात बहिनी भगवतीमध्ये चार भगवतीका मन्दिरहरू धार्मिक आस्थाका प्रतीक हुन् । तीमध्ये त्रिपुरासुन्दरी मन्दिर (राणाशयनी भगवती) विशेष रूपमा प्रसिद्ध छ । पौराणिक कथाअनुसार त्रिपुरासुर दैत्यको वध गरी मानवता र देवताको रक्षा गरेको मानिने यो मन्दिर श्रद्धालुहरूको मुख्य गन्तव्य बनेको छ।
त्यसैगरी, जगन्नाथ पञ्चदेव शिव धाम सप्तदेवल सहस्त्रलिङ्ग मन्दिर, रौला केदार, ग्वाल्लेक केदार, सिगासधुरा, निङ्गलाशैनी मन्दिर, मेलौली भगवती मन्दिर, दोगडा, बनारसी धाम, र पाताल भूमेश्वर जस्ता स्थलहरू धार्मिक पर्यटकहरूको लागि प्रमुख गन्तव्य हुन् । काठमाडौँ उपत्यकापछिको दोस्रो सर्वाधिक मन्दिर रहेको जिल्ला बैतडी हो । 

जसले धार्मिक पर्यटन प्रवद्र्धनमा महत्वपूर्ण भूमिका खेलिरहेको छ ।
बैतडीको इतिहास पनि गौरवमय छ । यो जिल्ला नेपालको स्वतन्त्रता र संघर्षको एउटा महत्वपूर्ण केन्द्र रहेको छ । शहीद दशरथ चन्दको जन्मस्थान यहीं पर्दछ, जसले राणा शासनविरुद्ध आफ्नो जीवन बलिदान दिएका थिए ।     उनको जन्मघरलाई ऐतिहासिक स्थलका रूपमा संरक्षित गरिएको छ, जसले पर्यटकलाई प्रेरणा दिने काम गरिरहेको छ ।

बैतडीको भौगोलिक विविधता अत्यन्त आकर्षक छ । हरियाली पहाडहरू, स्वच्छ वातावरण, मनमोहक दृश्य र मनोरम प्राकृतिक भ्यूटावरहरूले यहाँको पर्यटन सम्भावनालाई अझ उजागर गरेको छ ।
बैतडीको अर्को आकर्षण महाकाली नदीमाथि रहेको २३६ वर्ष पुरानो झुलाघाट झोलुंगे पुल हो । ऐतिहासिक रूपमा महत्त्वपूर्ण यो पुल नेपाल–भारत सम्बन्धको एउटा प्रमुख सांस्कृतिक सम्पदा पनि हो ।

बैतडी धार्मिक, ऐतिहासिक, सांस्कृतिक र प्राकृतिक सम्पदाले सम्पन्न जिल्ला हो । यहाँका प्रमुख धार्मिक स्थलहरू, पुरातात्त्विक संरचना, सांस्कृतिक पर्व र प्राकृतिक सौन्दर्यले पर्यटकलाई लोभ्याउँदै आएका छन् ।

                            (लेख:- उद्वब मार्कणड )